రేపు సంపూర్ణ చంద్రగ్రహణం..

హిందూ శాస్త్రాల్లో చంద్రగ్రహణానికి ఎంతో ప్రాముఖ్యత ఉంది. గ్రహణం రోజున కచ్చితంగా నియమాలు పాటించాలని శాస్త్రాలు బోధిస్తున్నాయి. గ్రహణ సమయంలో ఆహారం తీసుకోకూడదని, కొన్ని రాశులు, నక్షత్రాల వారు గ్రహణం చూడరాదని, గర్భిణి స్త్రీలు అటూఇటూ కదలకుండా స్థిరంగా ఒకచోట ఉండాలని, గ్రహణం విడిచిన వెంటనే ఇల్లంతా శుభ్రం చేసుకుని, తలంటు స్నానం ఆచరించి ఇష్టదైవాన్ని ప్రార్థించాలని ఇలా చాలా నియమాలే ఉన్నాయి. ఈ గ్రహణ నియమాలపై చాలా మందిలో భయాలున్నాయి. గ్రహణ నియమాలు కచ్చితంగా పాటిస్తేనే ఫలితాలు బాగుంటాయని, లేకపోతే అరిష్టాలు జరుగుతాయని ప్రజలు నమ్ముతారు. అందుకే గ్రహణం ఏర్పడినప్పుడు హిందువుల ఇళ్లలో కచ్చితంగా ఈ నియమాలను పాటిస్తారు.

ఇదిలా ఉంటే, ఈ ఏడాది తొలి సంపూర్ణ చంద్రగ్రహణం జనవరి 20, 21 తేదీల్లో ఏర్పడుతోంది. దీన్ని ‘సూపర్ బ్లడ్ వూల్ఫ్ మూన్ లూనార్ ఎక్లిప్స్‌’గా పిలుస్తున్నారు. వివిధ దేశాల కాలమానాల ప్రకారం ఈ గ్రహణం జనవరి 20, 21 తేదీల్లో కనిపించనుంది. ఉత్తర అమెరికా, మధ్య అమెరికా, దక్షిణ అమెరికా, యూరప్, పశ్చిమ ఆఫ్రికా, మధ్య ఆఫ్రికా, తూర్పు ఆఫ్రికా, ఆసియాలోని కొన్ని ప్రాంతాల్లో ఈ చంద్ర గ్రహణం కనిపిస్తుంది. అయితే భారతదేశంలో ఈ గ్రహణం కనిపించదు. అసలు గ్రహణ ప్రభావం మనదేశంపై అస్సలు ఉండదు. కాబట్టి గ్రహణ నియమాలు మనం పాటించాల్సిన అవసరం లేదని నిపుణులు చెబుతున్నారు. అయితే, అమెరికాలో నివసిస్తోన్న హిందువులు గ్రహణ నియమాలు పాటించాలని సూచిస్తున్నారు.

భారత కాలమానం ప్రకారం చంద్రగ్రహణం జనవరి 21న ఉదయం 8.06 గంటలకు ప్రారంభమై మధ్యాహ్నం 1.18 గంటలకు ముగుస్తోంది. ఉదయం 10.42 గంటలకు చంద్రగ్రహణం అత్యధిక స్థాయిలో కనిపిస్తుంది. మొత్తం గ్రహణ కాల సమయం 5 గంటల 9 నిమిషాల 28 సెకెన్లు. ఇక సంపూర్ణ చంద్రగ్రహణం ఉదయం 10 గంటల 11 నిమిషాల 17 సెకెన్లకు మొదలై 11 గంటల 13 నిమిషాల 15 సెకెన్లకు పూర్తవుతుంది. అంటే మొత్తం 61 నిమిషాల 17 సెకెన్ల పాటు సంపూర్ణ చంద్రగ్రహణం ఉంటుంది.

అయితే, ఈ సమయాల్లో చంద్రగ్రహణం ఏర్పడుతుందని తెలుసుకోవడం తప్ప మనం గ్రహణాన్ని చూడలేం. కాబట్టి, గ్రహణ నియమాలు పాటించాలా వద్దా అనే భయాన్ని పెట్టుకోవద్దు. మీకు పట్టింపులు మరీ ఎక్కువగా ఉంటే ఇంటిని శుభ్రం చేసుకోవడం, తలంటు స్నానాన్ని ఆచరించి దైవ పూజ చేసుకోవడం వంటివి చేసుకోండి. అంతకు మించి శాస్త్రీయపరమైన జాగ్రత్తలు తీసుకోవడం అనవసరం. ముఖ్యంగా గర్భిణీలు ఈ చంద్రగ్రహణం గురించి అస్సలు భయపడవద్దు.

2,041 total views, 55 views today