ఆ రంగు కార్లంటేనే భారతీయులకు మక్కువ.. అదో దర్జా!

ఒక్కొక్కరికి ఒక్కొక్క రంగు అంటే ఇష్టముంటుంది. వస్తువులైనా, దుస్తులైనా, వాహనాలైనా, స్మార్ట్‌ఫోన్స్ అయినా నచ్చిన రంగులో ఉంటేనే వాటిని ఎంచుకోవడానికి మొగ్గు చూపుతాం. ఇదంతా ఇప్పుడు ఎందుకంటే.. భారత్‌లో ఎక్కువ మంది ఇష్టపడే కార్ల రంగు ఏదో తెలుసుకునేందుకు జర్మనీకి చెందిన రసాయన సంస్థ బీఏఎస్‌ఎఫ్ ఒక సర్వే నిర్వహించింది. అందులో ఆసక్తికర అంశాలు వెల్లడయ్యాయి. అవేంటో చూద్దాం..

భారతీయులు తెలుపు రంగు కార్లంటే భలే ఇష్టమట. తెలుపు రంగు కార్లే ఉండాలని కోరుకుంటున్నారు. 2018లో 43 శాతం మంది తెలుపు రంగునే ఎంచుకున్నారు. తెలుపు తర్వాత గ్రే (15 శాతం), సిల్వర్ (15 శాతం) రంగుల వైపు మొగ్గుచూపారు. వీటి తర్వాతి స్థానంలో ఎరుపు (9 శాతం), నీలం (7 శాతం), నలుపు (3 శాతం) రంగులు ఉన్నాయి.

స్పోర్ట్స్‌ యుటిలిటీ వెహికిల్ (ఎస్‌యూవీ) కార్ల విషయంలో కూడా 41 మంది తెలుపు రంగు వైపే మొగ్గు చూపుతున్నారు. అలాగే కాంపాక్ట్ సెగ్మెంట్‌, కాంపాక్ట్ ప్రీమియం సెగ్మెంట్ల విషయంలో కూడా ఈ రంగుదే పైచేయి.

రంగు ఎంపిక అనేది కస్టమర్ వ్యక్తిత్వం మీద ఆధారపడి ఉంటుంది. వ్యక్తిగత అభిప్రాయం ఆధారంగానే కారు రంగు ఎంచుకుంటారు. కారు రంగు అనేది డిజైన్ మీద కూడా ఆధారపడి ఉంటుంది. ఒక మాదిరే కార్లకు కూడా అన్ని రంగులు కుదరవు. ఒక కారుకు ఒక రంగు కరెక్ట్‌గా సరిపోతుంది. అదే రంగు మరొక కారుకు సరిపోకపోవచ్చు.

తెలుపు రంగు ఎక్కువ కాలం మన్నికకు వస్తుంది. దీని నిర్వహణ కూడా సులభం. నలుపు రంగు కార్ల మీద దుమ్ము పడినా కూడా పెద్దగా కనిపించదని భావిస్తే పొరపాటే. తెలుపు రంగు కార్ల కన్నా నలుపు రంగు కార్ల మీదే మరకలు స్పష్టంగా కనిపిస్తాయి.

ఎన్ని సంవత్సరాలైనా కార్లు కొత్త వాటిలాగే ఉంటాయనే కారణంతో కస్టమర్లు చాలా మంది తెలుపు రంగును ఎంచుకోవడానికి ఇష్టపడతారు. అలాగే తెలుపును విలాసవంతమైన రంగుగా కూడా పరిగణిస్తాం. తెలుపు రంగు కార్లు పాపులర్ అవటానికి మరొక కారణం భద్రత. ఇవి రోడ్లపై బాగా కనిపిస్తాయి. ప్రత్యేకించి రాత్రి సమయాల్లో ఇతర వాహనాల డ్రైవర్ల కళ్లకు ఇవి స్పష్టంగా కనిపిస్తాయి. అందుకే నలుపు రంగు కార్ల కన్నా తెలుపు రంగు కార్లు తక్కువగా ప్రమాదాలకు గురికావడాన్ని గమనిస్తూ ఉంటాం. అంతేకాకుండా ఎండా కాలంలో నలుపు, డార్క్ కలర్ కార్ల లోపల వేడిగా ఉంటుంది. కానీ తెలుపు రంగు కార్లలో మాత్రం ఇలా ఉండదు. తెలుపు రంగుకు ఉష్ణాన్ని పరావర్తనం చెందించే గుణం ఉంటుంది.

5,576 total views, 117 views today