ఇంట్లో ఇల్లాలు వంటింట్లో ప్రియురాలులో వెంక‌టేశ్‌తో చేయాల్సింది: వ‌రుణ్‌తేజ్‌

విక్టరీ వెంకటేశ్, మెగా ప్రిన్స్ వరుణ్ తేజ్ హీరోలుగా శ్రీ వెంకటేశ్వర క్రియేషన్స్ బ్యానర్‌పై సక్సెస్‌ఫుల్ ప్రొడ్యూసర్ దిల్ రాజు నిర్మించిన చిత్రం ‘F2’. అనిల్ రావిపూడి దర్శకత్వం వహించారు. తమన్నా, మెహ్రీన్ హీరోయిన్లుగా నటించారు. ఔట్ అండ్ ఔట్ కామెడీ ఎంటర్‌టైనర్‌గా తెరకెక్కిన ఈ సినిమా సంక్రాంతి కానుకగా జనవరి 12న ప్రేక్షకుల ముందుకు వస్తోంది. ఈ సందర్భంగా గురువారం రాత్రి హైదరాబాద్‌లో చిత్ర ప్రీ రిలీజ్ వేడుకను నిర్వహించారు. ఈ వేడుకలో హీరోలు వెంకటేశ్, వరుణ్.. హీరోయిన్లు తమన్నా, మెహ్రీన్‌లతో పాటు నిర్మాతలు దిల్ రాజు, శిరీష్, దర్శకుడు అనిల్, సీనియర్ నటుడు రాజేంద్ర ప్రసాద్ తదితరులు పాల్గొన్నారు.

వేడుకలో భాగంగా వరుణ్ తేజ్ మాట్లాడుతూ ఈ సినిమాకు దిల్ రాజు నిర్మాత కాదని, శిరీష్ అని సరదాగా అన్నారు. ‘రాజు గారు, శిరీష్ గారితో ‘ఫిదా’ సినిమా చేశాను. ఆ తరవాత ఎలాంటి సినిమా చేయాల అనుకునేటప్పుడు అనిల్‌ని నా దగ్గరకు పంపించారు. ‘ఫిదా’ విడుదలయ్యే లోపలే నాకు F2 కథ చెప్పేశారు. ఆయనతో చెప్పడం ఎప్పుడూ సరదాగా ఉంటుంది. సారీ సార్.. ఈ సినిమాకు మాత్రం మా నిర్మాత శిరీష్ గారే. ఆయనే ఎప్పుడూ లొకేషన్‌కు వచ్చేవారు. మా అందరితో ఎంతో బాగా సమయం గడిపేవారు’ అని వరుణ్ సరదాగా అన్నారు. శ్రీ వెంకటేశ్వర క్రియేషన్స్ బ్యానర్‌లో పనిచేయడం తనకు దక్కిన గౌరవమని వరుణ్ చెప్పారు. ‘ఈ సినిమా తరవాత మరికొన్ని చిత్రాలు ఈ బ్యానర్‌లో చేయాలనుకుంటున్నాను’ అని అన్నారు.

సీనియర్ నటుడు రాజేంద్ర ప్రసాద్ పక్కన నటించడం తనకు దక్కిన అదృష్టమని వరుణ్ చెప్పారు. ఆయనొక వైవిధ్యమైన నటుడని కొనియాడారు. ఇక వెంకీ తమన్నా డార్లింగ్ మాత్రమే కాదని, తమందరి డార్లింగ్ అని నవ్వుతూ చెప్పారు. ‘ఇంట్లో ఇల్లాలు వంటింట్లో ప్రియురాలు సినిమాలో ఒక పాత్ర చేయడానికి చిన్నప్పుడు నన్ను అడిగారు. అప్పుడు స్కూల్లో సెలవులు కుదరట్లేదని అవ్వలేదు. మళ్లీ వాసు సినిమాలో వెంకటేష్ బ్రదర్‌గా చేయమని అడిగారు. అప్పుడు లావుగా ఉన్నానని పక్కన పెట్టారు. ఇప్పుడు మూడో ప్రయత్నం కుదిరింది’ అని తన జ్ఞాపకాలను పంచుకున్నారు.

ఇక వెంకటేష్ మాట్లాడుతూ.. ‘స్టేజ్ ఎక్కితే నాకెందుకో ఫస్ట్రేషన్ వచ్చేస్తుంది. 30 ఏళ్లుగా ఇదే ఫస్ట్రేషన్. స్టేజ్ మీద నేను ఎప్పటికీ కంఫర్ట్‌బుల్‌గా ఉండలేను. ఈ పండగకి F2 రావడం నాకు నిజంగా చాలా ఆనందంగా ఉంది. సంక్రాంతికి సరదాగా సాగే సినిమాతో వస్తే నన్ను ప్రేక్షకులు ఆదరిస్తూనే ఉన్నారు. ఇప్పుడు సంక్రాంతి అల్లుళ్లుగా మమ్మల్ని తీసుకొస్తూ అనిల్ పీక్స్‌కి తీసుకెళ్లిపోయాడు. సినిమా ఔట్‌పుట్‌పై చాలా హ్యాపీగా ఉన్నాను. నేను ఒక కథను హీరోలా వినను.. అసిస్టెంట్ డైరెక్టర్‌లా, ఆడియన్‌లా వింటాను. అందుకే దిల్ రాజు, నాకు మధ్య నిర్మాత-హీరో సంబంధ ఉండదు. నేను అతనికి సహ నిర్మాతగా, ప్రొడక్షన్ మేనేజర్‌గా భావిస్తాను’ అని చెప్పారు.

38 total views, 1 views today