బోయపాటి దెబ్బకు బాలయ్య రికార్డులు బలాదూర్!

తెలుగు సినిమా అంటేనే సుమోలు గాల్లో ఎగరడాలు, హీరో పది పదిహేను మందిని విసిరి కొట్టడాలు ఉంటాయని చాలా మంది భావన. వాస్తవంగా చెప్పాలంటే ఇదో విమర్శ. కానీ, ప్రేక్షకులు ఇవే చూస్తున్నారు కాబట్టి దర్శక, నిర్మాతలు కూడా ఇలాంటి కమర్షియల్ హంగులనే తీయడానికి ఇష్టపడుతున్నారు. బాలీవుడ్ సైతం ప్రస్తుతం మన కమర్షియల్ కథలను, ఇక్కడి హీరోయిజాన్ని కాపీ కొడుతోంది. అయితే.. ఆ యాక్షన్ సన్నివేశాలు, హీరోయిజం కొంత మేర వరకు పర్వాలేదుకానీ శృతిమించితే కష్టమే.

అప్పుడెప్పుడే ‘పల్నాటి బ్రహ్మనాయుడు’ సినిమాలో నందమూరి బాలకృష్ణ తొడకొడితే ట్రైన్ వెనక్కి వెళ్లిపోవడం, ఆయన పిలిస్తే కుర్చీ నడుచుకుంటూ వచ్చేయడం, కోడి పుంజుతో విలన్లను చంపేయించడం సన్నివేశాలను ప్రేక్షకులు ఇప్పటికీ విమర్శిస్తూ ఉంటారు. సహజత్వానికి చాలా దూరంగా ఉండే అప్పటి బాలయ్య సినిమాల్లోని యాక్షన్ సన్నివేశాలపై ఇప్పటికీ సెటైర్లు వేస్తుంటారు. ఇలాంటి సన్నివేశాలకు బాలయ్యను బ్రాండ్ అంబాసిడర్‌ను చేసేశారు. కానీ, ఇప్పుడు బాలయ్య రికార్డులన్నీ బలాదూర్ అయిపోయాయట. ఆయన స్థానంలోకి మెగా పవర్ స్టార్ రామ్ చరణ్ వచ్చారట. ప్రస్తుతం ట్విట్టర్‌లో నడుస్తోన్న ట్రోలింగ్ ఇదే.

రామ్ చరణ్ హీరోగా బోయపాటి శ్రీను దర్శకత్వంలో తెరకెక్కిన సినిమా ‘వినయ విధేయ రామ’. సంక్రాంతి సందర్భంగా ఈ చిత్రం నేడు(జనవరి 11న) ప్రేక్షకుల ముందుకు వచ్చింది. విదేశాల్లో, తెలుగు రాష్ట్రాల్లో ఇప్పటికే ఈ సినిమా చూసినవారు ట్విట్టర్ ద్వారా స్పందిస్తున్నారు. చిత్రంలోని భారీ యాక్షన్ సన్నివేశాలపై సెటైర్ల మీద సెటైర్లు వేస్తున్నారు. బోయపాటి యాక్షన్ సీన్లు భయానకమంటున్నారు. ‘పల్నాటి బ్రహ్మనాయుడు’ని మరిపిస్తున్నాయంటున్నారు. రామ్ చరణ్ విలన్ల తలకాయలు నరికితే అవి గాల్లోకి ఎగరడం, వాటిని గెద్దలు ఎత్తుకుపోవడం, వేగంగా వెళ్తోన్న ట్రైన్‌పై చరణ్ దర్జాగా నిలబడి రావడం, నాగుపాముతో వివేక్ ఒబెరాయ్ కాటు వేయించుకుంటే ఆ పాము చచ్చిపోవడం.. ఇలా చాలా సన్నివేశాలు నమ్మలేని విధంగా ఉన్నాయట. ఆ ట్రోలింగ్స్‌పై మీరూ ఓ లుక్కేయండి..

110 total views, 1 views today