‘RRR’లో అవకాశాన్ని వదులుకోను: ఈషా రెబ్బా

ప్రస్తుతం టాలీవుడ్‌లో రాణిస్తోన్న చాలా తక్కువ మంది తెలుగు హీరోయిన్లలో ఈషా రెబ్బా ఒకరు. ‘అంతకు ముందు ఆ తరవాత’ సినిమాతో వెండితెరకు పరిచయమైన ఈ వరంగల్ అమ్మాయికి ఆ తరవాత అవకాశాలు బాగానే వచ్చాయి. ఇటీవల ‘అరవింద సమేత’ లాంటి భారీ చిత్రంలో నటించి అందరి దృష్టిని ఆకర్షించారు. తాజాగా ‘సుబ్రహ్మణ్యపురం’లో సుమంత్ సరసన నటించారు. ఈ చిత్రం డిసెంబర్ 7న ప్రేక్షకుల ముందుకు వస్తోంది. ఈ నేపథ్యంలో చిత్ర విశేషాలతో పాటు పలు అంశాలపై మీడియాతో తన అభిప్రాయాలను ఈషా పంచుకున్నారు. మీడియా ప్రతినిధులు అడిగిన పలు ప్రశ్నలకు సమాధానాలిచ్చారు. ఆ విశేషాలు మీకోసం..

‘అరవింద సమేత’లో మీ పాత్ర సంతృప్తినిచ్చిందా?
బాగానే అనిపించింది. సాధారణంగా ఇలాంటి పెద్ద సినిమాల్లో హీరో కోసమే ప్రేక్షకులు వస్తారు. ఇక్కడ కూడా ప్రేక్షకులు సినిమాకు వచ్చేది ఎన్టీఆర్ కోసమే. కాబట్టి నా పాత్ర అంత గొప్పగా ఉందని చెప్పను. సినిమాలో నా పాత్ర వరకు అయితే హ్యాపీ.

‘అరవింద సమేత’ సినిమా మీ కెరీర్‌కు ఉపయోగపడిందా?
నాకు ఆ సినిమా ఉపయోగపడుతుందా, పడదా అని చేయలేదు. నచ్చి చేశానంతే.

దర్శకుడు సంతోష్ ‘సుబ్రహ్మణ్యపురం’ సినిమా కోసం మిమ్మల్ని ఎలా సంప్రదించారు?
నాకు థ్రిల్లర్స్ చాలా ఇష్టం. ఇదొక థ్రిల్లర్ అని సంతోష్ నాకు చెప్పారు. వాస్తవానికి ముందు నాకు ఒక మెయిల్ చేశారు. ఆ తరవాత నేను ఆయన్ని ఒక కాఫీ షాప్‌లో కలిశాను. రెండు గంటల పాటు స్టోరీ మొత్తం నెరేట్ చేశారు. ఆయన స్టోరీ చెబుతున్నప్పుడే నేను విజువలైజ్ చేసుకున్నాను. చాలా నచ్చింది. థ్రిల్లర్స్ ఎంగేజింగ్‌గా లేకపోతే నచ్చవు. కానీ ఈ సినిమాలో అది ఉంది. అందుకే ఈ ప్రాజెక్టుకు ఓకే చెప్పాను.

ఈ సినిమాలో మీ పాత్ర ఎలా ఉండబోతోంది?
దేవుడంటే చాలా నమ్మకం ఉంటుంది. తండ్రి, కుటుంబం అంటే తనకు ఎంతో ఇష్టం. ఊరంటే చాలా ఇష్టం. ఆ అమ్మాయిలో ఎక్కువ విలువలు ఉంటాయి. ఇలాంటి పాత్ర ఇప్పటి వరకు నేను చేయలేదు. థ్రిల్లర్‌లో నటించడం ఇదే తొలిసారి.

సుమంత్ పాత్ర ఎలా ఉంటుంది?
ఆయన అసలు దేవుడిని నమ్మరు. టెంపుల్ రీసెర్చ్ స్కాలర్‌ కార్తీక్‌గా సినిమాలో కనిపిస్తారు.

ఈ సినిమాలో లవ్ స్టోరీ కూడా ఉంటుందా?
కొంచెం ఉంటుంది. థ్రిల్లర్‌ను డిస్టర్బ్ చేసేంతగా అయితే ఉండదు. కార్తీక్ పాత్ర దేవుడిని నమ్మడు కాబట్టి.. ప్రియకి, అతనికి మధ్య మొదట్లో మనస్పర్థలు ఉంటాయి. తరవాత ప్రేమలో పడతారు.

‘RRR’, ఎన్టీఆర్ బయోపిక్‌లో మీరున్నారని గాసిప్‌లు వస్తున్నాయి. వాటిపై మీరేమంటారు?
‘RRR’ అయితే నా వరకు రాలేదు. వస్తే ఎంతో సంతోషంగా చేస్తాను. ఆ అవకాశాన్ని అస్సలు వదులుకోను. ఎన్టీఆర్ బయోపిక్ గురించి అయితే ఇప్పుడు నేను చెప్పలేను.

అంటే ఎన్టీఆర్ బయోపిక్‌లో మీరు నటిస్తున్నారా?
దాని గురించి కూడా నేను ఇప్పుడు చెప్పలేను. నాకు కూడా ఏమీ తెలీదు. నేనేమీ చెప్పలేను అన్నాను కదా అని ఈ సినిమాలో నటిస్తున్నట్టు నేను ఖరారు చేశానని అనుకోకండి.

సుమంత్ మీకన్నా చాలా సీనియర్ కదా.. ఆయనతో కలిసి నటించడం ఎలా అనిపించింది?
ఆయన్ని సీనియర్ అంటే నన్ను కొడతారు (నవ్వుతూ). ఇప్పటికే ఒక ఇంటర్వ్యూలో నేను సీనియరా అని నన్ను ఒకలా చూశారు. కానీ, నటన పరంగా ఆయన చాలా సీనియర్. ఆయన సినిమాలు నేను చాలా చూశాను. గోదావరి, గోల్కొండ హైస్కూల్, మళ్ళీరావా సినిమాలు చాలా ఇష్టం. ఆయన నటన చాలా సెటిల్డ్‌గా ఉంటుంది. ఆయనతో కలిసి నటించడం చాలా బాగా అనిపించింది. ఆయనతో షూటింగ్ మొత్తం చాలా సాఫీగా అయిపోయింది.

ఇండస్ట్రీలో తెలుగమ్మాయిలకు అవకాశాలు చాలా తక్కువగా వస్తాయంటారు. మీరేమంటారు?
ఈ ప్రశ్న ప్రతి ఇంటర్వ్యూలో నన్ను అడుగుతారు. మీకు ఇప్పటి వరకు సమాధానం తెలియలేదా? ఎదుగుదల ఎలా ఉందో మీకు తెలుసు కదా. నా గురించే చెప్పడంలేదు. నేను నాలుగన్నరేళ్లుగా ఇండస్ట్రీలో ఉన్నాను. నాకొచ్చే ప్రాజెక్ట్స్‌తో నేను సంతోషంగా ఉన్నాను. ఇండస్ట్రీలో మార్పు వస్తోంది. మీరే చాలా మంది తెలుగమ్మాయిలను ఇంటర్వ్యూలు చేసుంటారు.

మిమ్మల్ని తమిళంలోకి వెళ్లి సినిమాలు చేసుకోమని ఎవరో సలహా ఇచ్చారట.. నిజమేనా?
అవును. చాలా మంది ఉచిత సలహాలు ఇచ్చారు. ఇక్కడ తెలుగమ్మాయిలకి ఎదుగుదల ఉండదు. మీరు వేరే భాషల్లోకి ప్రయత్నాలు చేసుకోండి అని చెప్పారు.

ఇతర భాషల్లో ప్రస్తుతం సినిమాలు చేస్తున్నారా?
చేస్తున్నాను. కన్నడలో ఒకటి, తమిళంలో ఒకటి చేస్తున్నాను. తమిళంలో ఇదే నాకు తొలి సినిమా. తమిళ సినిమా షూటింగ్ డిసెంబర్ ఆఖరున మొదలవుతుంది. కన్నడ సినిమా ఫిబ్రవరి మొదటి వారంలో ప్రారంభమవుతుంది. కన్నడతో శివ రాజ్‌కుమార్ సినిమాలో నటిస్తున్నాను.

30 total views, 2 views today