బోర్డర్‌లో ఉగ్రవాదుల కంటే రోడ్లపై గుంతలే ప్రమాదక‌రం: సుప్రీం

రహదారులపై గుంతల కారణంగా ప్రమాదాలు జరిగి వేలాది మంది మృత్యువాత పడుతున్నారని సర్వోన్నత న్యాయస్థానం గురువారం ఆందోళన వ్యక్తంచేసింది. రహదారులపై ఉన్న గుంతల కారణంగా దేశవ్యాప్తంగా గత ఐదేళ్లలో 14,926 మంది ప్రాణాలు కోల్పోవడం అత్యంత బాధాకరమని సుప్రీం వ్యాఖ్యానించింది. ‘గుంతల కారణంగా పెద్ద సంఖ్యలో ప్రజలు చనిపోవడం ఏమాత్రం ఆమోదయోగ్యం కాదు. బహుశా సరిహద్దుల్లో, ఉగ్రవాదుల చేతుల్లో చనిపోతున్న వారి కంటే గుంతల కారణంగానే ఎక్కువ మంది ప్రాణాలు కోల్పోతున్నారు కావొచ్చు’ అని జస్టిస్‌ మదన్‌ బి లోకూర్‌ నేతృత్వంలోని ధర్మాసనం పేర్కొంది. 2013 నుంచి 2017 వరకు ఏటా రహదారులపై ప్రమాదకరంగా ఉండే గుంతల కారణంగా చనిపోతున్నవారి సంఖ్య చూస్తుంటే రోడ్ల నిర్వహణ గురించి అధికారులు ఏమాత్రం పట్టించుకుంటున్నట్లు కనిపించడం లేదని ధర్మాసనం మండిపడింది.

రహదారి భద్రత విషయంలో సుప్రీంకోర్టు మాజీ న్యాయమూర్తి జస్టిస్‌ కేఎస్‌ రాధకృష్ణన్‌ నేతృత్వంలోని కమిటీ అందజేసిన నివేదికపై కేంద్రం సమాధానమివ్వాలని కోర్టు ఆదేశించింది. తదుపరి విచారణను వచ్చే ఏడాది జనవరికి వాయిదా వేసింది. గతంలో జాతీయ రహదారులపై చోటుచేసుకుంటున్న ప్రమాదాల గురించి దాఖలైన ప్రజా ప్రయోజనం వ్యాజ్యాన్ని విచారించిన సుప్రీంకోర్టు కేంద్రంపై మండిపడింది. జాతీయ, రాష్ట్ర రహదారులపై మద్యం అమ్మకాలను నిషేధించాలని ఆదేశించింది. 2017 మార్చి 31 తర్వాత ఎట్టి పరిస్థితుల్లోను జాతీయ రహదారులపై మద్యం షాపులు ఉండరాదని స్పష్టం చేసింది. ఇదే కేసులో వివరణ దాఖలు చేయనందుకు కేంద్రంపై ఆగ్రహం వ్యక్తం చేసింది. ఏడాది పూర్తయినా కౌంటర్‌ అఫిడవిట్‌ ఎందుకు దాఖలు చేయడంలేదని ప్రశ్నించింది. ఇందుకు గాను కేంద్ర రవాణా మంత్రిత్వ శాఖకు రూ.25 వేల జరిమానా విధించింది.

17 total views, 2 views today