హెచ్‌1బీ వీసా విధానంలో భారీ మార్పులు!

అమెరికా అధ్యక్షుడు డోనాల్డ్ ట్రంప్ ‘హెచ్‌1 బి’ వీసాల విషయంలో అనుకున్నంత పనీ చేశారు. ఈ మేరకు హెచ్1బీ వీసాల దరఖాస్తు ప్రక్రియలో భారీ మార్పులను ట్రంప్ యంత్రాంగం ప్రతిపాదించింది. వాటి ప్రకారం అమెరికాలో చదువుకున్న వారికి అధిక ప్రాధాన్యం లభించడమే కాకుండా, విదేశీ ఉద్యోగుల సంఖ్య మరింత పెరిగే అవకాశం ఏర్పడనుంది. విదేశీ కార్మికుల్లో అత్యున్నత నైపుణ్యం, అత్యధిక జీతం పొందేవారికి ‘హెచ్‌1 బి’ వీసాలు జారీ చేస్తామని స్పష్టం చేసింది. కొత్త ప్రతిపాదనలతో ప్రభుత్వం నోటీసు కూడా జారీ చేసింది. కాంగ్రెస్‌ నిర్ణయించే పరిమితి మేరకు విదేశీ కార్మికులకు ‘హెచ్‌ 1 బి’ వీసా ఇచ్చే సమయంలో ఈ నిబంధనలను పాటించాలని పేర్కొంది.

అమెరికన్ కాంగ్రెస్ నిర్దేశించిన ప్రకారం ప్రతి ఏడాది 65వేల మందికి మాత్రమే హెచ్1బీ వీసాలను జారీ చేయాలని పరిమితి విధించారు. అయితే హెచ్1బీ వీసా కోసం భారీ సంఖ్యలో దరఖాస్తులు వస్తున్న నేపథ్యంలో 65వేల మందిని యూఎస్‌సీఐఎస్ లాటరీ పద్ధతి ద్వారా ఎంపిక చేస్తోంది. అమెరికాలో మాస్టర్స్ డిగ్రీ లేదా అంతకన్నా పై చదువులు చదువుకున్న వారు హెచ్1బీ వీసా కోసం దరఖాస్తు చేసుకుంటే అలాంటి వాటిలో నుంచి మొదటి 20వేల దరఖాస్తులను ఆ పరిమితి నుంచి మినహాయిస్తారు. వీరికి నేరుగా హెచ్1బీ వీసా లభిస్తుంది. కొత్త ప్రతిపాదనలపై డిసెంబర్‌ 3 నుంచి జనవరి 2 మధ్య ప్రజలు తమ అభిప్రాయం తెలుపవచ్చని ప్రభుత్వం స్పష్టం చేసింది. ఇక మిగిలిపోయిన దరఖాస్తులను లాటరీ ద్వారా ఎంపిక కోసం పంపుతారు.

ప్రతిపాదిత మార్పుల వల్ల అమెరికాలో మాస్టర్స్ డిగ్రీ లేదా అంతకన్నా ఉన్నత విద్యను అభ్యసించిన లబ్ధిదారుల సంఖ్య 16 శాతం (5,430 మంది ఉద్యోగులు) పెరుగవచ్చని డీహెచ్‌ఎస్ పేర్కొంది. ప్రతిభావంతులైన విదేశీ ఉద్యోగులను కోరుకునే సంస్థలు ఎలక్ట్రానిక్ రూపంలో నమోదు చేసుకోవడం ద్వారా ఖర్చులు తగ్గుతాయని తెలిపింది.

అమెరికా అధ్యక్షుడిగా బాధ్యతలు చేపట్టినప్పటి నుంచి డొనాల్డ్‌ ట్రంప్‌ ‘హెచ్‌1 బి’ వీసా జారీ విధానంలో సంస్కరణలపై కసరత్తు చేస్తుండటం తెలిసిందే. అమెరికా కాంగ్రెస్‌ నిర్దేశించిన ప్రకారం ఏడాదికి 65 వేల హెచ్‌1బీ వీసాలు ఇవ్వాలి. అమెరికా మాస్టర్స్‌ డిగ్రీ ఉన్న 20వేల మందిని ఈ పరిమితి నుంచి మినహాయించాలి.

43 total views, 5 views today