‘థగ్స్ ఆఫ్ హిందుస్థాన్’ సినిమా రివ్యూ

నటీనటులు: అమితాబ్ బచ్చన్, అమీర్ ఖాన్, కత్రినా కైఫ్, ఫాతిమా తదితరులు

సంగీతం : అజయ్, అతుల్

ఫోటోగ్రఫి : మానుశ్ నందన్

నిర్మాణ సంస్థ : యశ్ రాజ్ ఫిల్మ్స్

దర్శకత్వం : విజయ్ కృష్ణ ఆచార్య

కథ:
రెండు దశాబ్దాల క్రితం భారత్‌ను పాలించిన బ్రిటిష్ ఈస్ట్ ఇండియా కంపెనీకి, తిరుగుబాటు దారులకు మధ్య జరిగిన యుద్ధమే ఈ ‘థగ్స్ ఆఫ్ హిందుస్థాన్’ కథ. మీర్జా సికందర్ బేగ్ (రోనిత్ రాయ్)ను బ్రిటిష్ అధికారి క్లైవ్ (లాయిడ్ ఓవెన్) హతమార్చి ఆయన సామ్రాజ్యాన్ని చేజిక్కుంచుకుంటాడు. ఆ రాజ్యానికి యువరాణి అయిన జఫీరా (ఫాతిమా సన షేక్), ఖుదబక్ష్ అలియాస్ ఆజాద్ (అమితాబ్ బచ్చన్) కలిసి తిరుగుబాటు దళాన్ని ఏర్పాటుచేస్తారు. వీరిని బ్రిటిష్ ప్రభుత్వం ‘థగ్స్’ (దోపిడీ దొంగలు)గా పరిగణిస్తుంది. ఈ థగ్స్ బ్రిటిష్ అధికారిని ఎదిరించడమే కాకుండా తమ స్వాతంత్ర్యాన్ని తిరిగి పొందడానికి ప్రయత్నిస్తుంటారు. అయితే ఆజాద్ దళాన్ని అంతమొందించడానికి బ్రిటిష్ రాజ్ ఫిరంగి(ఆమిర్ ఖాన్) సహాయం తీసుకుంటుంది. ఆజాద్ పన్నాగాలను ఫిరంగి సాయంతో ముందుగానే పసిగట్టాలని ప్రయత్నిస్తుంది. మరి ఫిరంగి సాయంతో ఆజాద్ దళాన్ని బ్రిటిష్ రాజ్ అంతమొందించిందా? ఆజాద్ దళానికే చెందిన ఫిరంగి బ్రిటిష్ అధికారికి ఎందుకు సాయం చేశాడు? అనేది సినిమాలో చూడాల్సిందే.

కథలో ట్విస్టులు
ఈస్ట్ ఇండియా కంపెనీకి చిక్కిన కుదాభక్ష్ సైన్యం తప్పించుకొన్నాదా? కంపెనీకి తొత్తుగా వ్యవహరించే ఫిరంగీ మల్లాలో ఏదైనా మార్పు వచ్చిందా? జహీరా సంరక్షణ బాధ్యతను చేపట్టిన ఫిరంగీ ఎలాంటి ప్రభావాలకు లోనయ్యాడు? ప్రాణత్యాగానికి సిద్ధపడిన కుదాభక్ష్ పరిస్థితి ఏమైంది. ఈ కథలో డ్యాన్సర్ సురయ్యా (కత్రినా కైఫ్) పాత్ర ఏంటి? ఈస్ట్ ఇండియా కంపెనీని ఎలా ఎదురించి తమ సంస్థానాన్ని చేజిక్కించుకొన్నది అనే ప్రశ్నలకు సమాధానమే థగ్స్ ఆఫ్ హిందూస్థాన్ చిత్ర కథ.

ఎవరెలా చేశారంటే..
ఆజాద్ పాత్రకు అమితాబ్ బచ్చన్ ప్రాణం పోశారు. 76 ఏళ్ల వయసులోనూ కత్తి తిప్పుతూ యాక్షన్ సీన్లు అద్భుతంగా చేశారు. అసలు సినిమాకు ఆయన పాత్రే కీలకం. ఇక ఫిరంగి పాత్రలో ఆమిర్ నటన చాలా బాగుంది. వచ్చీ రాని ఇంగ్లిష్‌లో ఆయన చెప్పే డైలాగులు నవ్విస్తాయి. అయితే ‘పీకే’, ‘దంగల్’ లాంటి సినిమాల్లో ఆమిర్‌ను ఊహించుకుంటే ఈ పాత్ర చాలా మందికి పెద్దగా నచ్చకపోవచ్చు. కత్రినా కైఫ్‌ తన అందంతో అలరించింది. రెండు పాట‌ల్లో తన స్టెప్పులతో అదరగొట్టింది. ‘దంగ‌ల్’ ఫేమ్ ఫాతిమా షేక్‌కు మరో మంచి పాత్ర దొరికింది. మిగిలిన వారంతా తమ పాత్రల పరిధి మేర నటించారు.

సాంకేతికంగా..
సాంకేతికంగా సినిమా చాలా రిచ్‌గా ఉంది. ఈ సినిమాలో అధిక మార్కులు టెక్నికల్ టీమ్‌కే పడతాయి. విజువల్ ఎఫెక్స్, యాక్షన్ సన్నివేశాల చిత్రీకరణ అద్భుతంగా ఉన్నాయి. హాలీవుడ్ సినిమాలను గుర్తుచేస్తాయి. మనుష్ నందన్ సినిమాటోగ్రఫీ సినిమా స్థాయిని పెంచింది. జాన్ స్టీవర్ట్ నేపథ్య సంగీతం బాగుంది. యశ్ రాజ్ ఫిలింస్ నిర్మాణ విలువలు చాలా గ్రాండ్‌గా ఉన్నాయి.

చివరిగా..
దీపావళి కానుకగా వచ్చిన ఈ విజువల్ వండర్ ప్రేక్షకులకు మాత్రం వండర్‌లా అనిపించదు. ఆమిర్ అభిమానులకైతే నిరాశ తప్పదు. విజువల్ పరంగా సినిమా ఓకే కానీ.. కథ పరంగా చూసుకుంటే మాత్రం విషయం ఏమీ లేదనిపిస్తుంది.

రేటింగ్: 2.5/5

68 total views, 2 views today