ఐసీసీ వన్డే ర్యాంకింగ్స్.. కోహ్లి, బుమ్రా టాప్

వెస్టిండీస్‌తో గురువారం ముగిసిన ఐదు వన్డేల సిరీస్‌లో అదరగొట్టిన భారత క్రికెటర్లు.. ఐసీసీ ఈరోజు ప్రకటించిన వన్డే ర్యాంకింగ్స్‌లోనూ దూసుకెళ్లారు. బ్యాట్స్‌మెన్ జాబితాలో ఇప్పటికే టాప్‌లో ఉన్న కెప్టెన్ విరాట్ కోహ్లి ఆ స్థానాన్ని మరింత పదిలం చేసుకోగా.. బౌలర్ల ర్యాంకింగ్స్‌లో నెం.1 స్థానంలో ఉన్న జస్‌ప్రీత్ బుమ్రా పదేళ్ల తర్వాత అత్యధిక పాయింట్లు సాధించిన బౌలర్‌గా రికార్డు నెలకొల్పాడు.

వెస్టిండీస్‌తో సిరీస్ ఆరంభానికి ముందే టాప్‌లో ఉన్న కోహ్లి.. వరుసగా మూడు శతకాలు బాది ఇప్పుడు 899 పాయింట్లతో అగ్రస్థానాన్ని మరింత పదిలం చేసుకున్నాడు. ఇక ఓపెనర్ రోహిత్ శర్మ.. సిరీస్‌లో రెండు శతకాలు సాధించి 871 పాయింట్లతో రెండో స్థానానికి ఎగబాకాడు. సుదీర్ఘ కెరీర్‌లో రోహిత్‌కి ఇదే బెస్ట్ ర్యాంక్. ఈ ఇద్దరూ మినహా.. ఎవరూ టాప్-5లో చోటు దక్కించుకోలేకపోయారు.

బౌలర్ల జాబితాలో జస్‌ప్రీత్ బుమ్రా 841 పాయింట్లతో తన నెం.1 స్థానాన్ని సుస్థిరం చేసుకున్నాడు. వెస్టిండీస్‌తో కేవలం మూడు వన్డేలు మాత్రమే ఆడిన బుమ్రా.. ఆరు వికెట్లు పడగొట్టడం ద్వారా.. తన ర్యాంక్‌ని నిలబెట్టుకున్నాడు. మణికట్టు స్పిన్నర్లు కుల్దీప్ యాదవ్.. 723 పాయింట్లతో కెరీర్‌ బెస్ట్.. మూడో ర్యాంక్‌ని అందుకోగా.. చాహల్ (683) తొలిసారిగా టాప్-10లోకి ప్రవేశించి 8వ స్థానంలో నిలిచాడు.

వెస్టిండీస్‌ని ఐదు వన్డేల సిరీస్‌లో 3-1 తేడాతో ఓడించినా.. టీమ్ ర్యాంకింగ్స్‌లో భారత్ జట్టు అగ్రస్థానానికి ఎగబాకలేకపోయింది. ప్రస్తుతం 121 పాయింట్లతో భారత్ రెండో స్థానంలో కొనసాగుతుండగా.. కేవలం ఐదు పాయింట్లు ఎక్కువగా ఉన్న ఇంగ్లాండ్ (126) నెం.1 స్థానంలో ఉంది. వెస్టిండీస్ మాత్రం 72 పాయింట్లతో ఏకంగా 9వ స్థానానికి పడిపోయింది. భారత్, వెస్టిండీస్ మధ్య తొలి టీ20 మ్యాచ్ ఈడెన్‌గార్డెన్స్ వేదికగా ఆదివారం జరగనుంది.

34 total views, 1 views today