బాబు-రాహుల్ భేటీపై కేటీఆర్ ట్వీట్

బీజేపీయేతర పార్టీలతో కూటమి కట్టే పనిలో ఉన్నారు ఏపీ సీఎం చంద్రబాబు. గురువారం ఢిల్లీలో పర్యటించిన చంద్రబాబు.. కాంగ్రెస్ అధ్యక్షుడు రాహుల్ గాంధీతో పాటూ జాతీయ స్థాయి నేతల్ని కలిశారు. అయితే మొదటి నుంచి బద్ద శత్రువుల్లా ఉన్న కాంగ్రెస్-టీడీపీల అధినేతల భేటీ దేశ రాజకీయాల్లో చర్చనీయాంశమయ్యింది. ఈ తాజా పరిణామాలపై స్పందించిన వైసీపీ, బీజేపీలు చంద్రబాబు టార్గెట్‌గా సెటైర్లు పేల్చాయి. బాబు అవకాశవాది అంటూ విమర్శనాస్త్రాలు సంధించాయి.

ఈ భేటీపై తాజాగా తెలంగాణ ఆపద్ధర్మ మంత్రి కేటీఆర్ స్పందించారు. తనదైన శైలిలో చంద్రబాబుపై ట్విట్టర్‌లో పంచ్ పేల్చారు. చంద్రబాబు మాటల్ని ప్రతిధ్వనింపచేయడమే.. తానేమీ కామెంట్ చేయబోనంటూ.. బాబు గతంలో కాంగ్రెస్, సోనియా గాంధీ టార్గెట్‌గా చేసిన విమర్శల్ని ప్రస్తావించారు. కొన్ని ట్వీట్లను స్క్రీన్ షాట్లు తీసి పోస్ట్ చేశారు.

అవినీతి కాంగ్రెస్ నుంచి దేశానికి స్వాతంత్ర్యం తేవడమే లక్ష్యం.. రాహుల్‌ను ప్రధానిగా చేయాలనే సోనియా దేశ భవిష్యత్‌ను ప్రమాదంలోకి తోస్తున్నారు.. ఏపీ కాంగ్రెస్ నేతలు సోనియా కాళ్లపై పడ్డారు అంటూ బాబు గతంలో చేసిన ట్వీట్లను కేటీఆర్ ప్రస్తావించారు. మంత్రి ట్వీట్‌కు నెటిజన్ల నుంచి కూడా స్పందన వస్తోంది. కొందరు 2009లో టీఆర్ఎస్ కాంగ్రెస్ కలవలేదా అంటూ ప్రశ్నిస్తుంటే.. కేటీఆర్ ట్వీట్‌లో తప్పేముంది అంటూ మరికొందరు మద్దతుగా నిలుస్తున్నారు.

33 total views, 1 views today