ఉద్యోగులకు దీపావళి కానుక‌గా… 1000 కార్లు, 400 ఫ్లాట్స్!

తన సంస్థలో పనిచేసే ఉద్యోగులకు ఏటా దీపావళి సందర్భంగా ఖరీదైన బహుమతులు అందించే సూరత్ వజ్రాల వ్యాపారి, హరికృష్ణ డైమండ్స్ అధినేత సావ్జి దోలాకియా, మరోసారి తన గొప్ప మనసును చాటుకున్నారు. ఏటా దీపావళికి తన ఉద్యోగులకు సంస్థ గడించిన లాభాల్లో వాటాలు, భారీ కానుకలను అందజేస్తూ వార్తల్లో నిలిచే ఆయన, ఈ ఏడాది మరింత విలువైన కానుకలు అందజేయనున్నారు. తన సంస్థలో పనిచేసే ఉద్యోగులకు బహుమతుల కింద 1000 కార్లు, 400 ఫ్లాట్స్ ఇవ్వనున్నారు. మారుతి సుజుకి, ఆల్టో, సెలెరియాలు, ఫిక్స్‌డ్ డిపాజిట్లు, ఖరీదైన ప్లాట్లను అందజేయనున్నట్టు తెలిపారు.

సంస్థను నమ్ముకుని సుదీర్ఘకాలంగా పనిచేస్తున్న వారి అనుభవాన్ని బట్టి ఏటా దోలాకియా కానుకలు అందిస్తారు. అలాంటి వారిలో ఈ ఏడాది మొత్తం 1,716 మందిని ఎంపిక చేసిన ఆయన, కార్లు, ఫిక్సెడ్ డిపాజిట్లలో ఏది కావాలో నిర్ణయించుకునే అవకాశం వారికే ఇచ్చారు. సంస్థలో చేరి 25 సంవత్సరాలు పూర్తయిన వారికి రూ. 3 కోట్ల విలువైన బెంజ్ కార్లను బహుమతిగా ప్రకటించారు. మొత్తం 600 మంది వరకు కార్లను ఎంపిక చేసుకోగా వీరిలో మహిళా ఉద్యోగులకు ప్రధాని నరేంద్ర మోదీ చేతుల మీదుగా వాటి తాళం చెవులను ఇప్పటికే అందజేశారు. అయితే, 400 ఫ్లాట్స్ తీసుకున్నవారికి మాత్రం వాయిదాల పద్దతిలో వీటిని అందిస్తున్నారు. తమ సంస్థ హౌసింగ్ పథకంలో భాగంగా 1,100 చదరపు అడుగుల విస్తీర్ణంలో ఉండే ఒక్కో ఫ్లాట్స్‌ను కేవలం రూ.15 లక్షలకే అందజేస్తున్నారు. ఇందు కోసం సంస్థ ఐదేళ్ల పాటు నెలకు రూ.5 వేలు చొప్పున చెల్లిస్తుందని, అనంతరం ఉద్యోగులే నెలకు రూ.11,000 చెల్లించాలని సావ్జీ దోలకీయా తెలిపారు.

కాగా, గతేడాది పోలిస్తే ఈ సంవత్సరం దోలాకియా ప్రకటించిన బహుమతుల విలువ కాస్తంత తక్కువేనని తెలుస్తోంది. గతేడాది 491 కార్లు, 200 ఫ్లాట్స్ ఉద్యోగులకు అందజేశారు. సౌరాష్ట్రలోని అమ్రేలి ప్రాంతానికి చెందిన దోలాకియా, తన బంధువు దగ్గర కొంత మొత్తాన్ని అప్పుగా తీసుకుని 1977లో వ్యాపారం ప్రారంభించారు. సూరత్‌లో వ్యాపారం ప్రారంభించి, అంచెలంచెలుగా ఎదిగి, రూ. 6 వేల కోట్లస్థాయికి కంపెనీని విస్తరించారు. అలాగే తన కుమారుడ్ని ఓ సాధారణ వ్యక్తిలా ఉద్యోగం వెతుక్కోవాలంటూ కేవలం మూడు జతల బట్టలతోనే కేరళకు పంపి వార్తల్లో నిలిచారు.

35 total views, 1 views today