‘నన్ను దోచుకుందువటే’ సినిమా రివ్యూ

‘సమ్మోహనం’ లాంటి క్లాసికల్ హిట్ తర్వాత హీరో సుధీర్‌బాబు చేసిన చిత్రం ‘నన్ను దోచుకుందువటే’. ఈ చిత్రంతో ఆయన నిర్మాతగా కూడా మారారు. తన పేరిటే సుధీర్‌బాబు ప్రొడక్షన్స్ అనే బ్యానర్‌ను స్థాపించి ఈ చిత్రాన్ని నిర్మించారు. కన్నడ భామ నభా నతేష్ ఈ చిత్రంలో హీరోయిన్‌గా నటించింది. నాజర్, తులసి, వేణు ముఖ్య పాత్రల్లో నటించారు. కొత్త దర్శకుడు ఆర్.ఎస్.నాయుడు ఈ చిత్రానికి దర్శకత్వం వహించారు. ‘కిర్రాక్ పార్టీ’, ‘రాజరథం’ చిత్రాలకు సంగీతం అందించిన కన్నడ సంగీత దర్శకుడు అజనీష్ లోక్‌నాథ్ ఈ సినిమాకు పనిచేశారు. టీజర్, ట్రైలర్లతో ప్రేక్షకుల్లో ఆసక్తిని రేకెత్తించిన ఈ క్లాసికల్ లవ్ స్టోరీ శుక్రవారం ప్రేక్షకుల ముందుకు వచ్చింది. ఈ సినిమా ఎలా ఉందో సమీక్షలోకి వెళ్లి తెలుసుకుందాం.

కథ:
చిన్నతనంలోనే తల్లిని కోల్పోయిన కార్తీక్ (సుధీర్ బాబు) తర్వాత హాస్టల్లో ఉండి చదువుకుంటూ తండ్రి ప్రేమకు దూరం అవుతాడు. పెద్దయ్యాక సాఫ్ట్‌వేర్ కంపెనీలో పని చేస్తూ అమెరికా వెళ్లడమే లక్ష్యంగా కష్టపడుతుంటాడు. అలాంటి కార్తీక్‌ తన మరదలి సమస్యను పరిష్కరించడం కోసం సిరి అనే కొలీగ్ పాత్రను కల్పించి, తనను ప్రేమిస్తున్నానని తండ్రి (నాజర్‌)కి అబద్ధం చెబుతాడు. దీంతో షార్ట్ ఫిల్మ్‌లలో నటించే మేఘన (నభా నతేష్) కార్తీక్ జీవితంలో ప్రవేశిస్తుంది. తర్వాత వారిద్దరూ ఒకరినొకరు ఇష్టపడతారు.

మేఘన తన ప్రేమను వ్యక్తం చేసేలోగా ఆఫీస్ సమస్యల కారణంగా.. తనకు కెరీరే ముఖ్యం, ఇకపై కలవడం కుదరదని కార్తీక్ ఆమెతో చెప్పేస్తాడు. తర్వాత తప్పనిసరి పరిస్థితుల్లో ఆమె సిరిగా మళ్లీ కార్తీక్ కుటంబానికి తోడుగా ఉండాల్సి వస్తుంది. కార్తీక్ తన ప్రేమ విషయం చెప్పాలనుకున్నా మేఘనకు చెప్పలేకపోతాడు. చివరకు కార్తీక్ తను కలగన్నట్టుగానే అమెరికా వెళ్లిపోయాడా..? లేదంటే మేఘన ప్రేమను పొందాడా? అనేది ఈ సినిమా కథ.

ఎలా ఉందంటే..
చదువు, ఉద్యోగం, కెరీర్లో ఎదగడం.. ఇవి తప్ప నేటి యువతకు మరేది పట్టడం లేదు. కెరీర్ గ్రోత్ అంటూ మెకానికల్‌గా బతికేస్తున్నారు. సమాజంలో చాలా మంది ఎదుర్కొంటున్న ఈ సమస్యకు కాస్త ప్రేమ, ఫ్యామిలీ డ్రామాను కలిపి దర్శకుడు ‘నన్ను దోచుకుందువటే’ను తెరకెక్కించారు.

మరదలితో పెళ్లి చేస్తామని కార్తీక్‌కు ఇంట్లో వాళ్లు చెప్తారు. కానీ ఆమె వేరే అబ్బాయిని ప్రేమించానని చెప్పడంతో కార్తీక్ సిరి గురించి నాన్నకు చెప్తాడు. ఆమెను చూసేందుకు నాజర్ హైదరాబాద్ రావడం, ఆమెతో బాగా కలిసిపోవడం.. కార్తీక్‌ కూడా ఆమెను ఇష్టపడటంతో ఫస్టాఫ్ సాఫీగా సాగిపోతుంది. కానీ ఇంటర్వెల్ ముందు నిన్ను కలవడం కుదరదని హీరో ట్విస్ట్ ఇస్తాడు. హీరోహీరోయిన్లు, వైవా హర్ష మధ్య వచ్చే కామెడీ సీన్ సినిమా మొత్తానికే హైలెట్. సుధీర్ బాబు తన యాక్టింగ్‌తో ప్రేక్షకులను కడుపుబ్బా నవ్విస్తాడు.

తొలి అర్ధబాగంతో పోలిస్తే సెకండాఫ్ కాస్త నెమ్మదిస్తుంది. క్లైమాక్స్ ముందు తండ్రి కొడుకుల మధ్య వచ్చే సన్నివేశాలు కాస్త సాగదీసినట్టు అనిపించినప్పటికీ.. సెంటిమెంట్ వర్కౌట్ అయ్యింది. మరి కాస్త ఎమోషన్‌ పండితే బాగుండేది.

ఎవరెలా చేశారు..?
ప్రేమ, పెళ్లి లాంటి విషయాలేవి పట్టకుండా కెరీర్ కోసం కష్టపడే యువకుడి పాత్రలో సుధీర్ బాబు బాగా నటించారు. ముఖ్యంగా ఫస్టాఫ్‌లో వచ్చే కామెడీ సీన్లలో అతడి యాక్టింగ్ చాలా బాగుంది. కన్నడ భామ నభా నతేష్ అద్భుతంగా నటించింది. తన నటనతో ప్రేక్షకులను మెప్పించింది. అందం, అభినయంతో ఆకట్టుకుంది. కార్తీక్ తండ్రి పాత్రలో నాజర్ జీవించారు. హీరోయిన్ తల్లి పాత్రలో తులసి పరిధి మేరకు నటించింది. వైవా హర్ష కామెడీ బాగుంది.

సాంకేతిక విభాగం
ఈ సినిమా ద్వారా డైరెక్టర్‌గా పరిచయమైన ఆర్.ఎస్.నాయుడు తొలి ప్రయత్నంతోనే ఆకట్టుకున్నారు. కొన్ని కొన్ని సీన్లను బాగా హ్యాండిల్ చేశారు. కథ పెద్దగా లేనప్పటికీ.. కథనంతో సినిమాను నడిపించారు. ప్రేక్షకుడు ఎక్కడా బోర్ ఫీలవకుండా చేయడంలో దాదాపు సఫలమయ్యారు. హీరోగానే కాకుండా నిర్మాతగానూ సుధీర్ బాబు మెప్పించారు. ఎక్కడా రాజీ పడకుండా సినిమాను తెరకెక్కించారు. పాటలు అంతగా ఆకట్టుకోలేదు. ఛోటా కే ప్రసాద్ ఎడిటింగ్ బాగుంది.

చివరిగా..
ప్రేక్షకుడిని ఎక్కడా విసిగించకుండా, సరదాగా సాగిపోయే సినిమా ఇది. కామెడీ, ఫ్యామిలీ సెంటిమెంట్ ఆకట్టుకుంటాయి. వీకెండ్లో హాయిగా గడపాలని అనుకునేవారు హ్యాపీగా ఈ సినిమా చూసేయొచ్చు.

రేటింగ్: 3/5

232 total views, 1 views today